Alatoran_header  
Əsərlər > Elxan Zal Qaraxanlı > Cinlərin dağılanda

Reklamların işığı,
Axşamın gülüşüdü.
Bax, dondurma yeməkdən
Sevgimiz də üşüdü.

Ayağımın altında,
İki qatlanır bu park.
Bəlkə, mən Sen-Jermenəm
Bəlkə də, sən Janna Dark.

Metro hicran atıdı,
Pilləkənlər üzəngi.
Gələndə Leyli gəldin,
Gedəndə Ərəbzəngi.

Tilsiməmi düşübsən?
Bu, nə işdi, ay fağır.
Cinlərin dağılanda,
Məni təzədən çağır.

                                          1995