Alatoran_header  
Əsərlər > Sevinc Pərvanə > Sərhədd xəttində

siqareti arxayınca sümürəcəksən
gözəlliyini itirmək qorxusunu
geridə qoyarkən

ən azı öyünəcəksən
qırmızı xoruzun başına
bıçaq çəkə bildiyinə görə

müştəri nəzərləriylə
kişi kimi süzəcəksən
cavan xanımları
saralmış dişlərin arasından
hirslə üfürəcəksən tüstünü
gözəl sifətlərinə
və həm də gizlicə sevinəcəksən
onların da yavaş-yavaş
sənə yaxınlaşdığına

kişiləri isə unutmaq məsləhətdir
gəncliyində bir kişiyə mənsubluğun həzzini
anlamayan qadına